值得一睇,以下為全文:

(Po完今朝篇文,收到好多網友inbox狠人,提出好多關於中美貿易戰/侵侵的疑問,有見及此,狠人搵左一位美資i-bank好友,詳細寫下佢對今次侵侵的睇法!P.S. 狠人呢位好朋友係香港人,上晒岸,由721之後變為深黃,佢有十多年分析美股經驗,都算係半個中美關係專家。大家可以參考下!)

全文:

“I actually think this deal is a great deal for the people of Hong Kong to see what happened. I think this is a very positive thing for Hong Kong.”

認真,我覺得侵侵無講錯,今次中美達成階段性初步協議的確係現階段對香港抗爭運動最好嘅結果,理由如下:

1. 我地話想攬炒,究竟係攬炒緊邊個?林鄭?黑警?香港?no no no,唯一有用嘅係同中共攬炒。點解我地遊行要舉曬美國旗,山長水遠去人地國會聽證?就係想借美國去攬炒中共。咁美國可以點樣幫我地搞掂中共?侵侵係生意人,識得玩梗係用經濟做低你啦,唔通派太平洋艦隊進駐東海,定係喺沖繩美軍基地射幾支戰斧導彈過嚟?記唔記得當初蘇聯點樣瓦解?美國無真係發射過一枚飛彈,而係搞到你經濟爆破自己潰敗。宜家中國經濟有幾差全世界都知,侵侵仲唔趁機執多你兩劑。到時經濟下滑搞到民怨沸騰,習總黨內外嘅仇家起來反抗,內憂外患,最後完美支爆。

2. 今次初步協議點睇都係中國跪低、美國完勝:美國只係應承下星期唔加中國5%額外關稅……住,但係中國就要向美國買多500億美元農產品,仲要喺知識產權、金融、貨幣等政策讓步。簡單啲嚟講,相比貿易戰開打之前,中國並無點向美國買少到嘢,相反購買嘅農產品可能仲多過以前。另一邊廂,美國已經收緊你中國3700億產品嘅關稅(一年大概830億美元稅項袋袋平安),宜家只暫緩不撤回當中2500億得嗰5%嘅額外關稅,呢個擺到明係不平等條約。仲要幾日前美國先對有份參與新疆鎮壓嘅公司同官員實施制裁,中國對咁嘅條款都肯制,證明大陸經濟有幾差。

3. 宜家咩具體內容都無,協議半張紙都未簽過。侵侵其實想同你拖多一兩個月。佢宜家國內面對被彈劾嘅壓力,絕對唔想幾條戰線同時間打,階段性勝利可以幫佢贏返啲民意,搞掂國內嘅事先同你中國死過。同時,佢選擇唔同劉鶴簽,要等到11月同習總面對面先簽就係要你中國無得再好似5月咁反口唔認數。由宜家到11月,侵侵仲有香港民主人權法案,同埋最後武器喺12月再加你1600億產品15%關稅,你敢唔認數?我地香港雖然成日被大陸人話只不過係中國一個城市,但其實喺領導人心目中係春袋,絕大部分外資都係通過香港先可以進入大陸。話香港係中國嘅ATM一啲都唔過份。如果有一日香港失去特殊地位,呢部ATM壞左,你屋企有14億人要養活,自己又爭人周身債,到時跳樓都唔掂?侵侵宜家就係和你拖,等人權法過埋,自己手上揸住4條煙先一次過曬你冷。香港人,俾啲耐性。

4. 侵侵話香港可以搞掂自己,意思其實就係叫中共唔好直接或間接通過林鄭、建制、中資、鄉黑干預香港自治。呢個係對中共嘅警告,如果過左界嘅話,美國有權大力制裁中國。新疆政策已證明侵侵唔係得把口。

5. 侵侵表面上話香港示威人數少左,情況大幅緩和,仲話中國喺香港事件取得好大進展,你地就話人地當香港condom。大佬,宜家侵侵同劉鶴面對面講數,梗係要俾返少少薄面人地,言語上討好對方。唔通你期望侵侵喺談判桌上面叫中共唔好插手香港事務,立即實行雙普選?咁即係反台唔駛傾啦。侵侵話密切注視香港示威情況,經過上星期嘅行動升級,盲嘅都唔會話示威有所緩和啦下話。侵侵其實幫緊我地勇武手足做國際文宣,喺佢雪亮嘅眼睛裡,「裝修」、「鶳」只係小兒科,對佢呢啲見慣大場面嘅大總統嚟講已經算係緩和( “tone down a lot”!)

同時,侵侵提曬水,叫我地香港人不割蓆不分化,和理非要企出來做大個勢,有咁大得咁大,再多次百萬遊行震撼彈先做到最大嘅國際輿論效果!

最後,再講多次:我地要繼續和勇一家,保持作戰狀態,總之多你一個就好狠多!手足們,我地好快煲底見!

(狠人按:可以的話幫手Share呢篇文章,我朋友好比心機寫!大家繼續加油!唔好氣餒!好多人都係自己嘅崗位出緊力!願榮光歸香港!)

Source: 華爾街狠人fb

(Po完今朝篇文,收到好多網友inbox狠人,提出好多關於中美貿易戰/侵侵的疑問,有見及此,狠人搵左一位美資i-bank好友,詳細寫下佢對今次侵侵的睇法!P.S….

Posted by 華爾街狠人 on Saturday, 12 October 2019