要數蘋果最當紅產品,大家可能會覺得是 iPhone X,因為 Apple Shop 依然未能 walk in 購買,不過實情是,蘋果最火爆、最人氣的產品是其貌不揚的 AirPods,據悉因臨近聖誕,歐美地區供貨量嚴重告急,即使 AOS 仍然有貨可供訂購,但最快要等到明年初才會送貨,意味買來做聖誕禮物的話,幾乎無望。正因為 AirPods 比預期中更受歡迎,所以 2017 年年中開始已盛傳蘋果有意推出第二代 AirPods,可惜一直未有確切消息,事到如今,AirPods 2 終於上市有期,而且產量更會 double up!?

於 2016 年發布的 AirPods,初登場時因為設計狀似潛望鏡、水喉通等,各界負評不斷,只是「你有你鬧,我有我賣」,AirPods 銷情之旺,遠超預期,叫人大跌眼鏡,香港更曾一度炒升接近 HK$2,000,比原價只售 HK$1,288 的 AirPods 高出差不多 HK$800,比 iPhone 7/7 Plus 更好賺!

經歷年多的銷售,AirPods 人氣不減,長賣長缺,令蘋果要急急提升產量,應付市場需要。知名分析師郭明錤最新爆料稱,蘋果將於 2018 年下半年推出 AirPods 第二代,造型和充電盒設計會跟第一代略有分別,售價也可能會調高至 US199(約 HK$1,548),貨量預計會大增至 2,600 萬甚至更多,比第一代的 1,400 萬增加足足一倍。